File Catalog
| Main » Files » My files |
Աշոտ Ալեքսանյան
| 2010-11-08, 8:03 PM | |
ԿՅԱՆՔ ՈՉ ԻՄԱՑՅԱԼ
Ընկերոջս` Գրիգոր Հակոբյանի հավերժական հիշատակին
Հանդիպահայաց քերծերի միջև
համորեն ձգվող մի տարածություն,
սկիզբ ու վախճան իրար շաղկապող
համընդհատական ընթացք ու տևում:
Զուգաշխարհների միջև դիմադարձ
կախակայված ես որպես հայեցում,
թափառ հայացքդ անհայտին հառած`
հառաջանում ես քայլքով անրջուն:
Անէությունից ծնունդ առնելով`
բռնում ես ուղին երևութական,
անրջապատիր լուռ սահանկումով
հաղթահարում ես և’ փոս և’ փապար:
Օդաճոճումներ շրջանասփյուռ,
անինքնավստահ նախածին քայլեր,
դու ճաշակում ես խինդ ու դառնություն
ինքնաբավ նյութիդ շինվածքին վայել:
Զույգ անհայտների միջև հարատև`
քամածեծ արվող մազե կամրջակ,
որ վիճակված ես քայլ առ քայլ անցնել`
գայթելով մեկ աջ ու մեկ էլ ահյակ:
Սրտի թակոցից մինչև վերջնազարկ`
հաշված օրերի թվաբանություն,
սրտամկանի կծկումից մինչև
վերջնաթալկացում ձգվող ճանապարհ:
Ձույլ ժամանակի սռնուն բաղհյուսված
գալարախռիվ եթերամալուխ,
որ շրջադարձին լույսի տվնջյան
դարպասում է մեզ առավոտ կանուխ:
Օդաճոճումներ հավերժանհաստատ
լկամասարքի բանուկ սնարին,
բևեռախույզի հոգս ու երկմտանք`
սահմանն հատելու կեսճանապարհին:
Ինքնահաստատման ծեքծեքուն ցույցեր`
բազմած թևերին ինքնախոշտանգման,
անդնդախարիսխ հիմք ու ապավեն,
բևեկնախեժով զմռսված տապան:
Կենաց տվիչի վեցնօրյա տքնանքն
ի դերև հանող մեծամոլություն,
անցողիկության սնարին տպված
կատարելատիպ ապականացու:
Այս ու այստեղի և այժմի միջև
լուռ տարուբերվող ինքնաշարժ մի կետ,
որ շատ նման է սողքին մրջնաձև,
թե փորձես ողջը վերևից դիտել:
Այս ու այսքանի միջև սակարկող,
բայց հավելյալից չխորշող բնավ,
որ նշմարելով այնտեղն ու հետոն`
ջարդուփշուր է լինում ընդունայն:
Կիսականգառներ` ճամփեքին թափուր,
հանգրվանախույս ժրաջան ընթացք,
խորափոսերում ծվարած արբունք,
և մարդահասակ խութեր համերամ:
Անդուլ հոգսերից ու բնազդային
բռնկումներից հյուսկեն անդրաշխարհ,
մանր կրքերի ու հաճույքների
տիրապետություն` ամենապատկառ:
***
Ա’րդ, մե’նք որ չնչին կետեր ենք անոսր,
այլև բեկ-բեկ,
ընթանում ենք մեր կենաց ուղեծրով`
մերկ ու գլխահակ,
մինչև որ հանկարծ գահավիժում ենք`
զարմացքով անկեղծ,
մեր առաջ բացվող խորափոսի մեջ`
ձույլ ու դժնդակ:
| |
| Views: 904 | Downloads: 0 | Comments: 30 | Rating: 0.0/0 | |
| Total comments: 0 | |
