8:03 PM Նմանություն Չարենցին | |
ԱՆՄԵՂՍԱԳԻՏԱԿ, ՔԱՆԶԻ` ՄԵՂԱՊԱՐՏ
Անվարժ եմ, տեր իմ, իմաստին կյանքի, արժե այդ մասին խոսակցենք շիտակ, քեզ համար կյանքը գոյ է հարակից, մեզ համար, սակայն, բարի հիշատակ: Քեզ համար սուրբ է խորհուրդը կյանքի, մենք սրբացնում ենք խորհուրդը մահվան, մահը քեզ համար հատույց է անգին, մենք կյանքն անհատույց դնում ենք գրավ: Դու արարել ես երկինք ու երկիր, բայց սխալվել ես մի հարցում վստահ, այն, որ երկուսի միջև ուղեկից կապարարներին կարգել ես հրեշտակ: Անձրև’ կարգեիր մեր ու քո միջև, մեր ու մեր միջև կարգեիր դու քեզ, մե’զ ձեռնադրեիր տերուտնօրեն աշխարհի փառքի ու անձիդ միջև: Պարտադրեցի'ր դու մեզ ազատ կամք, կամքն այդ պտտվեց ի շրջանս յուր, կյանքը դարձավ կայք, ապրելը` ապրանք, և քո ողջ ջանքը դարձավ ապարդյուն: Գայթակղությամբ գործը պսակվեց, մեղսակցությունը հաջորդեց մեղքին, դու չքմեղացար և, ահա, փակվեց շղթան բանիբուն` ամենավերջին: Կանգ առ, ուրեմն, Ժամ է իսկապես, որ ով ում հասնի` գցի մեղքի տակ, ասածս հանկարծ լուրջ բան չկարծես, այլ մի անհասցե, անանուն կատակ: Եվ առհասարակ իմացած լինես, քո կատակներն էլ մենք չենք հասկանում, մեղքը, տեր աստված, քոնն է, թերևս, որ, ինչպես հարկն է, մեզ չես ծառայում: Մեզ ըստ պատկերի քո արարելով, դու քեզ դրել ես կրկնամեղքի տակ, ստեղծեիր մեզ մե’ր իսկ պատկերով` կլինեինք մենք անմեղսագիտակ: | |
|
Total comments: 0 | |